नाउपाको घरझगडामा अल्झिएको राजनीति

राजनीति

गृहपृष्ठ
राजनीति
नाउपाको घरझगडामा अल्झिएको राजनीति

नाउपाको घरझगडामा अल्झिएको राजनीति

बिहीबार, भदौ ५, २०८२ शब्दचित्र

काठमाडौं । नागरिक उन्मुक्ति पार्टीकी अध्यक्ष रञ्जिता श्रेष्ठ र संरक्षक रेशम चौधरीको विवादले सो पार्टीका गतिविधि प्रभावित हुँदै आएका छन् । श्रेष्ठ र चौधरी श्रीमान–श्रीमती हुन् । तर, उनीहरूको घर झगडाले नाउपा मात्र नभएर राष्ट्रिय राजनीति नै तरंगित हुने गरेको छ ।

यी दुईको घर झगडाका कारण संसद सचिवालय समेत अन्यौलमा परेको देखिन्छ । जसका कारण सभामुख देवराज घिमिरेले नाउपा सत्तापक्ष हो कि प्रतिपक्ष हो त्यसको निक्र्याेल गर्नुपर्ने बताएका छन् । नाउपाको विवाद संसद सचिवालयसम्म पुगेपछि सचिवालयले पनि यसबारे निर्णय लिइसकेको छैन ।

असार २२ गते रेशम चौधरी पक्षमा रहेका गंगाराम चौधरीले आफ्नो पार्टीले सरकारलाई दिएको समर्थन फिर्ता लिएको जानकारी गराएका थिए । जसका कारण आफ्नो दल प्रतिपक्षमा बस्ने जनाएका थिए । त्यसपछि संसद सचिवालयले नाउपालाई प्रतिपक्षमा बस्नका लागि सिट व्यवस्थापन गरिदियो ।

सुरुमा नाउपाको संसदीय दलको नेता श्रेष्ठ थिइन् । पछि उनलाई हटाएर गंगाराम चौधरी संसदीय दलको नेता र लालवीर चौधरी सचेतक बनाइएको छ । जसका कारण संसद सचिवालयले गंगाराम चौधरीको पत्रअनुसार सिटको व्यवस्थापन गरिदिएको थियो ।

तर, गंगाराम चौधरीको पत्रसँग बाझिने गरी श्रेष्ठले बुधबार दुईवटा पत्र संसद सचिवालयमा पठाइन् । श्रेष्ठले पठाएका पत्रमा संसदीय दलको नेता परिवर्तन गरी गंगाराम चौधरीलाई हटाएर आफैँ बनेको र सरकारलाई पार्टीले दिएको समर्थन कायमै रहेको उल्लेख छ ।

श्रेष्ठले पत्रमा आफ्नो पार्टीलाई सत्तापक्षमा बस्ने व्यवस्था मिलाउन पनि भनेकी छन् । यसरी एउटै पार्टीका दुई थरी फरक फरक आसयका पत्र आएपछि संसद सचिवालयलाई पनि निर्णय लिन केही समस्या भएको छ ।

प्रकाशित मिति: बिहीबार, भदौ ५, २०८२ ०७:३२