काठमाडौं । बुङ्गल हाइड्रो लिमिटेडले सर्वसाधारहरूका लागि साधारण शेयर अर्थात् आईपीओ ल्याउने भएको छ ।
कम्पनीले दिएको जानकारीअनुसार हाल जारी पुँजी ८३ करोडको ३५ प्रतिशत अर्थात् २९ करोड ५ लाख बराबरको आईपीओ जारी गर्न लागेको हो ।
कम्पनीले १०० रुपैयाँ अंकित दरमा उक्त रकमबराबरको २९ लाख ५ हजार कित्ता शेयर जारी गर्नेछ ।
त्यसमध्ये कम्पनीले यसअघि आयोजना प्रभावित र वैदेशिक रोजगारीमा रहेका नेपालीहरूका लागि आईपीओ जारी गरी बिक्री गरिसकेको छ । अब दोस्रो चरणमा सर्वसाधारणका लागि आईपीओ जारी गर्न लागिएको हो ।
जसमध्ये कम्पनीले जारी पुँजीको १० प्रतिशत अर्थात् ८ करोड ३० लाख बराबरको १०० रुपैयाँ अंकित दरमा ८ लाख ३० हजार कित्ता शेयर आयोजना प्रभावित क्षेत्रका बासिन्दाहरूको लागि बाँडफाट गरिसकेको छ ।
त्यस्तै बाँकी रहेको २० करोड ७५ लाख बराबरको १०० रुपैयाँ अंकित दरमा २० लाख ७५ हजार कित्ताको १० प्रतिशत अर्थात् २ लाख ७ हजार ५०० कित्ता शेयर वैदेशिक रोजगारीमा रहेका नेपालीहरूलाई बाँडफाट गरिसकेको कम्पनीले जनाएको छ ।
अब ५ प्रतिशत अर्थात् १ लाख ३ हजार ७५० कित्ता शेयर सामूहिक लगानी कोष र ३ प्रतिशत अर्थात् ६२ हजार २५० कित्ता शेयर कम्पनीका कर्मचारीहरूका लागि सुरक्षित गरिएको छ ।
त्यसपछि बाँकी रहेको कुल १७ लाख १ हजार ५०० कित्ता साधारण शेयरमा सर्वसाधारणले आवेदन दिन पाउनेछन् ।
बुङ्गल हाइड्रोको उक्त आईपीओमा भदौ १६ गतेदेखि आवेदन दिन पाइनेछ । उक्त आईपीओमा छिटोमा भदौ १९ गतेसम्म आवेदन दिन पाइनेछ । उक्त समयमा पर्याप्त आवेदन नपरेमा भने भदौ ३० सम्म आवेदन दिने समय रहनेछ ।
कम्पनीको आईपीओ निष्कासन तथा बिक्री प्रबन्धकमा हिमालयन क्यापिटल लिमिटेड रहेको छ ।
