काठमाडौं । पिपुल्स पावर लिमिटेडले आफ्ना शेयरधनीहरूका लागि जारी गर्दा आवेदन नपरेको हकप्रद शेयर शिलबन्दी बोलपत्रद्वारा बिक्री गर्ने भएको छ । कम्पनीले ३ लाख ९१ हजार ७७९ कित्ता अवितरित हकप्रद शेयर शिलबन्दी बोलपत्रद्वारा लिलाम बढाबढ गरी बिक्री गर्न लागेको हो ।
कम्पनीका अनुसार उक्त शेयर किन्न इच्छुक लगानीकर्ताले यही भदौ १५ गतेदेखि भदौ २२ गतेसम्म शिलबन्दी बोलपत्र पेस गर्नुपर्नेछ ।
कम्पनीले यही असार २२ गतेदेखि साउन २६ गतेसम्म शेयरधनीहरूलाई कम्पनीको चुक्ता पुँजीको ५० प्रतिशत अर्थात् १:०.५० का दरले (१० कित्ता बराबर ५ कित्ता) का दरले हकप्रद शेयर निष्कासन गरेको थियो । त्यसबेला कम्पनीले ६३ करोड २६ लाख रुपैयाँको ५० प्रतिशतले प्रतिकित्ता १०० रुपैयाँ अंकित दरमा ३१ लाख ६३ हजार कित्ता हकप्रद शेयर जारी गरेको थियो ।
त्यसरी जारी गरिएको हकप्रद शेयरमध्ये आवेदन नपरेको ३ लाख ९१ हजार ७७९ कित्ता अवितरित हकप्रद शेयर कम्पनीले लिलाम प्रक्रियाद्वारा बिक्री गर्न लागेको हो ।
कम्पनीको धितोपत्र निष्कासन तथा बिक्री प्रबन्धकमा प्रभु क्यापिटल लिमिटेड रहेको छ । कम्पनीले एक सूचना प्रकाशित गर्दै प्रभु क्यापिटल लिमिटेड, कमलादी काठमाडौंमा बोलपत्र आवेदन फारम पाइने तथा बुझाउनुपर्ने जनाएको छ ।
त्यस्तै, प्रभु बैंकका शाखा कार्यालयहरू विराटनगर, वीरगञ्ज, हेटौँडा, पोखरा, बुटवल, सुर्खेत तथा धनगढीमा पनि बोलपत्र फाराम पाइने तथा बुझाउने स्थान तोकिएको छ ।
