काठमाडौं । एशियन लाइफ इन्स्योरेन्स कम्पनी लिमिटेडको आफ्ना शेयरधनीहरूका लागि जारी गरेको हकप्रद शेयर (राइट शेयर) बाँडफाट गरेको छ ।
कम्पनीले मिति २०८२/०२/१६ गतेभन्दा अघिल्लो दिनसम्म कायम शेयरधनीहरूको लागि ४२ प्रतिशत अर्थात् १ कित्ता साधारण शेयर बराबर ०.४२ कित्ता शेयर (१:०.४२) को अनुपातमा रु. १००/- अङ्कित दरको १,४२,७९,३१२.४८ कित्ता हकप्रद साधारण शेयरको निष्काशन तथा बिक्री खुल्ला गरेको थियो ।
कम्पनीले उक्त संख्यामा राइट शेयर बिक्री खुला गरे पनि त्यसमध्ये रितपूर्वक आवेदन दिने २७, ६२२ जना शेयरधनीहरुलाई १,३९,२०,८०० कित्ता हकप्रद शेयर बाँडफाट गरेको छ । कम्पनीले एक सूचना जारी गरी मिति २०८२ भदौ ०८ गते निष्काशनकर्ता कम्पनीको सञ्चालक समितिले बाँडफाँड गरेको जानकारी दिएको हो ।
यसका साथै आफ्नो कायम हकभन्दा बढी माग गरी दरखास्त दिने आवेदकहरुको हकमा बाँडफाँडमा नपरेका हकप्रद शेयर बापतको रकम मिति २०८२ भदौ ११ गते बुधबार देखि IPS मार्फत सम्बन्धित आवेदकहरूको बैंक खातामा रकमान्तर गरिने व्यवस्था मिलाइएको पनि कम्पनीले जानकारी दिएको छ ।
यसरी कम्पनीले कुल १ करोड ४२ लाख ७९ हजार ३१२.४८ कित्ता राइट शेयर जारी गरेकोमा रितपूर्वक आवेदन परेका १ करोड ३९ लाख २० हजार ८०० कित्ता शेयर बाँडफाट गरिएको छ । त्यसमा बाँकी रहेको ३ लाख ५८ हजार ५१२.४८ कित्ता अवितरित शेयर कम्पनीले अब लिलामी प्रक्रियामार्फत बिक्री गर्नेछ ।
कम्पनीको धितोपत्र निष्कासन तथा बिक्री प्रबन्धकमा मुक्तिनाथ क्यापिटल लिमिटेड रहेको छ ।
