काठमाडौं । श्रीनगर एग्रीटेक इन्डस्ट्रिज लिमिटेडले आजदेखि पहिलो चरणको प्रारम्भिक सार्वजनिक निष्कासन अर्थात् आईपीओ निष्कासन गरेको छ ।
कम्पनीले पहिलो चरणमा उद्योग प्रभावित क्षेत्रका स्थानीय र वैदेशिक रोजगारीमा रहेका नेपालीहरूका लागि आईपीओ जारी गरेको हो । पहिलो चरणमा जारी भएको यो आईपीओमा वैदेशिक रोजगारीमा रहेका नेपाली र रुपन्देही तथा पाल्पाका स्थानीले आवेदन दिन पाउनेछन् ।
यही साउन १३ गते नेपाल धितोपत्र बोर्ड (सेबोन) ले कम्पनीलाई आईपीओ निष्कासनको अनुमति दिएको थियो । सेबोनले कम्पनीलाई प्रतिकित्ता १०० रुपैयाँ अंकित दरमा आईपीओ निष्कासनको अनुमति दिएको हो ।
यससँगै कम्पनीले ३२ लाख ६२ हजार ५०० कित्ता शेयर आईपीओका माध्यमबाट सर्वसाधारणका लागि बिक्री गर्नेछ । यसो हुँदा अब कम्पनीले ३२ करोड ६२ लाख ५० हजार रुपैयाँ आईपीओ बिक्रीबाट उठाउनेछ ।
कम्पनीले त्यसमध्ये १०० रुपैयाँ अंकित दरका १ लाख ६३ हजार १२५ कित्ता शेयर उद्योग प्रभावित स्थानीयका लागि जारी गरेको हो । त्यस्तै १०० रुपैयाँ अंकित दरका ३ लाख ९ हजार ९३८ कित्ता शेयर वैदेशिक रोजगारीमा रहेका नेपालीहरूका लागि छुट्याइएको छ ।
उक्त शेयरमा न्युनतम १० कित्तादेखि अधिकतम १० हजार कित्तासम्म आवेदन दिन पाइनेछ ।
आजदेखि निष्कासन हुने उक्त शेयरमा उद्योग प्रभावित स्थानीयले छिटोमा भदौ २५ गतेसम्म आवेदन दिन सक्नेछन् । उक्त अवधिमा पर्याप्त आवेदन नपरे ढिलोमा असोज ९ गतेसम्म आवेदन दिने समय रहनेछ ।
त्यस्तै वैदेशिक रोजगारीमा रहेका नेपालीहरूको हकमा भने छिटोमा भदौ १५ गते र ढिलोमा भदौ २५ गतेसम्म आवेदन दिने समय रहने कम्पनीले जनाएको छ ।
कम्पनीले आईपीओ निष्कासन तथा बिक्री प्रबन्धकमा नबिल इन्भेस्टमेन्ट बैंकिङ लिमिटेडलाई नियुक्त गरेको छ ।
