काठमाडौं । नेकपा (एमाले) मा केपी शर्मा ओली र विद्यादेवी भण्डारी लामो समय एकै समूहमा रहेका नेताहरू हुन् । खासगरी पार्टीको नेतृत्व माधव कुमार नेपालले गर्दा ओली र भण्डारीले उनलाई चुनौती दिन्थे ।
त्यसो त ओलीलाई एमालेको अध्यक्षमा निर्वाचित हुनका लागि भण्डारीले सहयोग गरेकी थिइन् । अनि भण्डारीलाई राष्ट्रपति बनाउन पनि ओलीको भूमिका थियो । यसरी हेर्दा यी दुई नेताले एक अर्काको राजनीतिक करियरलाई सहयोग गर्दै आएको देखिन्थ्यो ।
भण्डारी राष्ट्रपति र ओली प्रधानमन्त्री हुँदा पनि एकले अर्कोलाई सहयोग गर्दै आए । कतिसम्म भने ओली नेतृत्वको सरकारले गरेका निर्णयहरूमा भण्डारीले सहयोगीको भूमिका निर्वाह गरेको भन्दै उनको त्यतिबेला पनि आलोचना भएको थियो ।
कतिसम्म भने ओलीले दुई-दुई पटकसम्म संसद विघटन गर्दा पनि नरोकेको बरु त्यसलाई 'संविधानविपरीत' सदर गरेको भन्दै भण्डारीको त्यसबेला निकै आलोचना भयो । यो विषय सर्वोच्च अदालतसम्म पुग्यो । अनि सर्वोच्च अदालतले दुवै पटक संसद विघटनलाई असंवैधानिक भन्दै पुनर्स्थापना गरिदियो ।
यसरी हेर्दा एक अर्काका प्रायः हरेक निर्णयमा साथ दिँदै र राजनीतिक सहकार्य गर्दै आएका यी दुई नेता अहिले एमालेको राजनीतिमा आमनेसामने भएका छन् । पूर्वराष्ट्रपति भण्डारी सक्रिय राजनीतिमा फर्कने तयारीमा छन् । त्यसका लागि उनले एमालेको पार्टी सदस्यता नवीकरण पनि गरिसकेकी छन् ।
तर, एमालेले उनको सदस्यता नवीकरणलाई गलत भन्दै त्यस्तो नवीकरण नभएको जनाएको छ । एमालेले भण्डारीको सदस्यता नवीकरणको ढोका नै बन्द गरिदिएको छ ।
तर, कतिपयले भने यसलाई भण्डारीले ओलीलाई पार्टी नेतृत्वमा चुनौती दिन सक्ने देखेपछि ओलीले एमालेको बैठकबाट उक्त कदम उठाएको टिप्पणी पनि गरेका छन् । हुन पनि भण्डारीले आफू एमालेमा फर्किएको मात्र बताएकी छैनन् पार्टीको नेतृत्व गर्न पनि तयार रहेको टिप्पणी गरिसकेकी छन् ।
जानकारहरूका अनुसार अहिले भण्डारीबाहेकले ओलीलाई एमाले अध्यक्षमा चुनौती दिन सक्ने अवस्था छैन । तर, भण्डारी स्वयं मैदानमा उत्रने अवस्था आएमा भने परिस्थिति फरक पनि हुन सक्थ्यो । किन पनि भने एमालेमा पनि ओलीप्रति असन्तुष्टि नभएको होइन । त्यसका केही उदाहरणहरू पछिल्लो समय देखिन थालिसकेको छ ।
एमालेका वरिष्ठ उपाध्यक्षलगायतका नेताहरू नै भण्डारीलाई एमालेको सक्रीय राजनीतिमा आउनबाट रोक्न नहुने पक्षमा देखिएका छन् । यसले भण्डारीले ओलीलाई एमालेमा राम्रै चुनौती दिन सक्ने सम्भावना रहने थियो ।
तर, एमालेले भण्डारीले एमाले फर्कने ढोका बन्द गरिदिएपछि अर्को निर्णय नहुन्जेलसम्मको लागि त्यस्तो सम्भावना टरेको विश्लेषण पनि भइरहेको छ ।
हालै प्रधानमन्त्री ओलले एमालेको अध्यक्षमा उठेमा भण्डारीले जित्ने सम्भावनै नरहेको टिप्पणी गरेका छन् । प्रतिस्पर्धा कटुतामा बढ्न सक्ने र त्यसमा पार्टीले एक्सन लिएर भण्डारीलाई कारबाही गर्नुपर्ने पनि हुन सक्ने भन्दै राष्ट्रपति भइसकेको व्यक्तिलाई पार्टीले कारबाही गर्नु राम्रो विषय नभएको टिप्पणी गरेका छन् । त्यसैले पनि आफूहरूले पूर्वराष्ट्रपतिलाई सक्रिय राजनीतिमा नआउन भनेको उनको भनाइ छ ।
तर, पछिल्लो समय ओलीले केही समयपहिला दिएको एक अन्तर्वार्ता पनि सामाजिक सञ्जालहरूमा भाइरल बनाइएको छ । उक्त अन्तर्वार्तामा ओलीले राष्ट्रपति भइसकेको व्यक्तिलाई सक्रीय राजनीतिमा आउनबाट रोक्न नहुने टिप्पणी गरेका छन् । यसले भने ओलीको अहिलेको अडान र एमालेको निर्णयमाथि प्रश्न उठाएको छ ।
अहिले ओलीमाथि नै चुनौती देखेर एमालेले भण्डारीको सदस्यता नवीकरणमा रोक लगाएको त होइन ? भन्ने प्रश्न उठेको छ । र, त्यसरी प्रश्न उठाउनेहरूमध्ये ठूलो पङ्क्ति भण्डारीलाई एमालेमा फर्कन दिनुपर्छ भन्ने एमालेकै नेता कार्यकर्ताहरू रहेका छन् ।
