काठमाडौं । एशियन लाइफ इन्स्योरेन्स कम्पनी लिमिटेडको अवितरित हकप्रद शेयर लिलामीका लागि राखिएको छ । कम्पनीले एक सूचना प्रकाशित गरी संस्थापक र सर्वसाधारण समूहको हकप्रद शेयर लिलाम बढाबढ गरी बिक्री गर्न शिलबन्दी बोलपत्र आह्वान गरेको छ ।
कम्पनीले संस्थापक समूहको ३० हजार ३८.५७ कित्ता र सर्वसाधारण समूहको ३ लाख २८ हजार ४७३.९१ कित्ता अवितरित हकप्रद शेयर शिलबन्दी बोलपत्रद्वारा बिक्री गर्न लागेको हो ।
उक्त शेयर किन्न चाहनेले यही भदौ २२ गतेदेखि भदौ २९ गतेसम्म आवेदन दिन सकिने कम्पनीले प्रकाशित गरेको सूचनामा जनाइएको छ । शेयरको न्यूनतम मूल्य प्रतिकित्ता १०० रुपैयाँ तोकिएको छ । बोलपत्र पेश गर्दा संस्थापक समूहतर्फ न्यूनतम १००० कित्ता र सर्वसाधारण समूहतर्फ न्यूनतम १०० कित्ताका लागि आवेदन दिनुपर्ने कम्पनीले जनाएको छ ।
कम्पनीले धितोपत्र निष्काशन तथा बिक्री प्रबन्धकमा मुक्तिनाथ क्यापिटललाई तोकेको छ । जसका कारण मुक्तिनाथ क्यापिटल लिमिटेडको नारायणचौर नक्सालस्थित कार्यालयबाट बोलपत्र आवेदन फारम पाइने र सोही ठाउँमा बुझाउनुपर्ने कम्पनीले जनाएको छ ।
त्यसका साथै मुक्तिनाथ विकास बैंकका शाखा कार्यालयहरूः ठिमी भक्तपुर, कुमारीपाटी ललितपुर, बिर्तामोड, विराटनगर, वीरगञ्ज, जनकपुर, हेटौँडा, नारायणगढ, चिप्लेढुङ्गा पोखरा, बागलुङ, बुटवल, घोराही दाङ, नेपालगञ्ज, विरेन्द्रनगर, धनगढी र महेन्द्रनगरमा पनि बोलपत्र पाइने र बुझाउन सकिने सूचनामा उल्लेख छ ।
