राष्ट्रपतिको अपिल- संविधान बचेको छ, बडो जुक्तिले प्राप्त अवसरको सदुपयोग गरौँ

समाचार

गृहपृष्ठ
समाचार
राष्ट्रपतिको अपिल- संविधान बचेको छ, बडो जुक्तिले प्राप्त अवसरको सदुपयोग गरौँ

राष्ट्रपतिको अपिल- संविधान बचेको छ, बडो जुक्तिले प्राप्त अवसरको सदुपयोग गरौँ

शनिबार, भदौ २८, २०८२ शब्दचित्र

काठमाडौं । राष्ट्रपति रामचन्द्र पौडेलले जेनजी आन्दोलनप्रति लक्षित गर्दै असहज, विषम र भयपूर्ण परिस्थितिमा कठिन प्रयत्नपछि शान्तिपूर्ण निकास निस्किएको उल्लेख गरेका छन् ।

पौडेलले संविधान र संसदीय प्रणाली बचेको पनि उल्लेख गरेका छन् । 'देशको अत्यन्त असहज, विषम र भयपूर्ण परिस्थितिमा कठिन प्रयत्नपश्चात एउटा शान्तिपूर्ण निकास निस्किएको छ,' शनिबार राष्ट्रपति पौडेलले जारी गरेको अपिलमा भनेका छन्, 'संविधान बचेको छ, संसदीय प्रणाली बचेको छ र संघीय लोकतान्त्रिक गणतन्त्र कायम रहेको छ ।'

पौडेलले अब ६ महिनाभित्र प्रतिनिधिसभाको चुनाव गरी अझ उन्नत लोकतन्त्रको बाटोमा अघि बढ्ने अवसर जनताले पाएको पनि उल्लेख गरेका छन् ।

'बडो जुक्तिले प्राप्त अवसरको सदुपयोग गर्दै जनता रिझाउने र आफैँमा सम्हालिँदै आगामी फागुन २१ गते हुने चुनाव सम्पन्न गराउने काममा सहयोग गर्न म सबै पक्षलाई हार्दिक अपिल गर्दछु,' उनले अपिलमा भनेका छन् ।

गए राति प्रधानमन्त्री सुशीला कार्कीको सिफारिसमा राष्ट्रपति पौडेलले प्रतिनिधिसभाको विघटन गरेका थिए । उक्त कदमविरुद्ध प्रायः सबै दलहरूले विरोध र आपत्ति जनाएका छन् । त्यसपछि राष्ट्रपतिले उक्त अपिल जारी गरेका हुन् ।