पछिल्लो २४ घण्टामा ९ हजार ३०५ जना नयाँ भेरियन्टसहितको कोरोना भाइरस (कोभिड –१९) का सङ्क्रमित थपिएको स्वास्थ्य तथा जनसङ्ख्या मन्त्रालयले जनाएको छ ।
योसँगै नेपालमा सक्रिय कोरोना संक्रमितको सङ्ख्या १ लाख १ हजार ६३४ पुगेका छन् । पहिलो पटक संक्रिय कोरोना सङ्क्रमितको सङ्ख्या एक लाख नाघेको हो ।
मन्त्रालयका अनुसार २० हजार ३६२ जनाको पीसीआर र ४२४ जनाको एन्टिजेन परीक्षणमा ९ हजार ३०५ जनामा सङ्क्रमण पुष्टि भएको हो ।
यसमध्ये पीसीआरबाट ९ हजार २३८ र एन्टिजेन विधिको परीक्षणका क्रममा ६७ जनामा सङ्क्रमण पुष्टि भएको जनाइएको छ ।
सबैभन्दा बढी काठमाडौँमा ३ हजार २५० जनामा सङ्क्रमण पुष्टि भएको छ । ललितपुरमा ४४८ र भक्तपुरमा २२६ जनामा सङ्क्रमण पुष्टि भएको छ । काठमाडौँ उपत्यकामा २४ घण्टामा कूल ३ हजार ९२४ जनामा सङ्क्रमण पुष्टि भएको हो ।
यसैगरी बढी सङ्क्रमण पुष्टि भएका जिल्लामध्ये रूपन्देहीमा ७७१, कैलालीमा ३३९, मोरङमा ३३६, झापामा ३००, बाँकेमा २८७, दाङमा २७७, कास्कीमा २३५ जना कोरोना सङ्क्रमित पछिल्लो २४ घण्टामा थपिएका छन् ।
नेपाली सेनाद्वारा गरिएको शव व्यवस्थापनको तथ्याङ्कका आधारमा कोभिड १९ सङ्क्रमणबाट गत २४ घण्टामा १६८ जनाको मृत्यु भएको छ । हालसम्म कोरोना सङ्क्रमणबाट मृत्यु हुनेको सङ्ख्या ४ हजार २५२ पुगेको छ ।
यस अवधिमा ४ हजार ४४४ जना कोरोना भाइरसको सङ्क्रमणबाट मुक्त भएको मन्त्रालयले जनाएको छ । हालसम्म ३ लाख १६ हजार ४६८ जना सङ्क्रमणमुक्त भएका छन् । यो कुल सङ्क्रमितको ७४.९ प्रतिशत हो ।
सक्रिय सङ्क्रमितमध्ये काठमाडौँ उपत्यकाका तीन जिल्लामा सर्वाधिक सङ्ख्या छ । हालसम्म कोरोना भाइरसबाट सङ्क्रमितको सङ्ख्या ४ लाख २२ हजार ४१६ पुगेको छ । सक्रिय कोभिड १९ सङ्क्रमितमध्ये १ लाख १ हजार ६३४ जना आइसोलेसनमा छन् । जसमध्ये १ हजार २४१ को आईसीयूमा उपचार भइरहेको छ । भेन्टिलेटरमा राखेर २८५ जनाको उपचार भइरहेको मन्त्रालयले जनाएको छ ।
.jpg)
