आइतबार थप ७ हजार ३६८ जनामा कोरोना भाइरस सङ्क्रमण पुष्टि भएको छ । योसँगै नेपालमा कोरोना भाइरसबाट सङ्क्रमितको सङ्ख्या ४ लाख ५५ हजार २० पुगेको छ ।
थप १९ हजार ४३९ जनाको पीसीआर परीक्षण तथा २४४ जनाको एन्टिजेन विधिबाट परीक्षण गरिएकामा पीसीआर विधिबाट ७ हजार ३१६ तथा एन्टिजेनबाट ५३ जनामा सङ्क्रमण पुष्टि भएको हो ।
हालसम्म पीसीआर परीक्षण गराउनेको सङ्ख्या २७ लाख ७० हजार ९८० जना पुगेको छ । हाल ७०१ सङ्क्रमित क्वारेन्टिनमा रहेको स्वास्थ्य तथा जनसङ्ख्या मन्त्रालयका प्रवक्ता डा. जागेश्वर गौतमले जानकारी दिए ।
हालसम्म ३ लाख ३९ हजार ७५६ जना कोरोना भाइरसबाट मुक्त भएका छन् । पछिल्लो २४ घण्टामा देशभर ६ हजार ६४८ सङ्क्रमित निको भएर घर फर्किएका छन् ।
शनिबार ५ हजार ४५५ सङ्क्रमित निको भइ घर फर्किएका थिए । निको हुने दर ७४.७ प्रतिशत रहेको मन्त्रालयले जनाएको छ । हाल देशभर १ लाख १० हजार २६३ सक्रिय सङ्क्रमित रहेका छन् ।
संस्थागत आइसोलेसनमा ७ हजार ८०८ तथा होम आइसोलेसनमा १ लाख २ हजार ४५५ रहेका छन् । हाल देशभर ७०१ सङ्क्रमित क्वारेन्टिनमा रहेको मन्त्रालयले जनाएको छ ।
काठमाडौं उपत्यकामा २ हजार ६०९ सङ्क्रमित
काठमाडौँ उपत्यकामा पछिल्लो समय २ हजार ६०९ सङ्क्रमित थपिएका छन् । काठमाडौँमा १ हजार ८ सय ८१, ललितपुरमा ४३६ र भक्तपुरमा २९२ जनामा सङ्क्रमण पुष्टि भएको मन्त्रालयले जनाएको छ ।
काठमाडौँमा हाल सक्रिय सङ्क्रमितको संख्या २९ हजार ६५ रहेको छ । हालसम्म कोरोनाबाट १ लाख ३२ हजार ८१५ निको भएका छन् भने १ हजार १३८ सङ्क्रमितको मृत्यु भएको छ ।
यस्तै ललितपुरमा हाल ७ हजार ११८ सक्रिय सङ्क्रमित रहेका छन् । हालसम्म २० हजार ३४१ सङ्क्रमित निको भएका छन् भने कोरोनाबाट ३०४ सङ्क्रमितको मृत्यु भएको छ ।
यस्तै भक्तपुरमा ४ हजार ९७८ सक्रिय सङ्क्रमित छन् । निको हुनेको संख्या ११ हजार ३४३ रहेको छ भने २२१ सङ्क्रमितले ज्यान गुमाएको मन्त्रालयले जनाएको छ ।
मृत्यु हुनेको संख्या ५ हजार नाघ्यो
नेपालमा कोरोना भाइरसको सङ्क्रमणबाट मृत्यु हुनेको सङ्ख्या ५ हजार नाघेको छ । पछिल्लो समय कोरोनाबाट १४५ सङ्क्रमितको मृत्यु भएको छ । योसँगै कोरोना भाइरसको सङ्क्रमणबाट ज्यान गुमाउनेको संख्या ५ हजार एक पुगेको मन्त्रालयले जनाएको छ ।
.jpg)
