संस्कृति, पर्यटन तथा नागरिक उड्डयनमन्त्री प्रेमबहादुर आलेले नेपाल वायुसेवा निगमका कार्यकारी अध्यक्ष युवराज अधिकारीलाई हातपात गरेको भनी आएको समाचारको खण्डन गरेका छन् ।
शुक्रबार एक विज्ञप्ति जारी गर्दै उनको सचिवालयले मन्त्री आलेले कुनै पनि कर्मचारीमाथि दुर्व्यवहार नभएको दाबी गरेको हो । नेपाल वायु सेवा निगमका कार्यकारी अध्यक्षमाथि हातपात गरेको भनी आएका समाचारको सचिवालयले खण्डन गर्दै विज्ञप्ति प्रकाशित गरेको हो ।
कार्यकारी अध्यक्षमाथि हातपात गरेको भनी आफूलाई जोडेर आएका समाचारप्रति आफ्नो गम्भीर ध्यानाकर्षण भएको पनि आलेले बताएका छन् । समाचारमा उल्लेख भएजस्तो संस्कृति, पर्यटन तथा नागरिक उड्डयन मन्त्रालयमा बोलाइ मातहतका कुनै पनि कर्मचारीलाई दुर्व्यवहार तथा हातपात नगरिएको आलेको सचिवालयले जनाएको छ ।
यसबारेमा मन्त्रालय र सिंहदरबार परिसरमा रहेका सीसीटीभी क्यामेरा हेर्दा पनि प्रष्ट हुने आलेको सचिवालयको भनाइ छ । आवश्यक परे मन्त्रालय र प्रशासनले सीसीटीभी फुटेज उपलब्ध गराउन सक्ने पनि विज्ञप्तिमा जनाइएको छ ।
कतिपय कामहरूमा निर्देशन दिनुपर्ने, सचेत गराउनुपर्ने, सम्झाउनुपर्ने हुनसक्ने र मन्त्रालयलको नेतृत्वकर्ताको हैसियतले त्यो क्रम निरन्तर पनि रहने भन्दै आलेले पछिल्ला दिनमा उडान सङ्ख्या वृद्धि हुँदै गएको तर जापानलगायतका गन्तव्यमा सर्वसाधारण, विद्यार्थी, भारतमा उपचारमा जाने बिरामीलगायतले टिकट सहजै नपाउने, निगमकै कारण बजारमा कृतिम अभाव गराई आफू निकट एजेन्सीबाट मात्रै टिकट बिक्री गर्ने गरेको भन्नेजस्ता गुनासो अत्यधिक आएपछि स्थानीय तहको चुनावअघि नै कार्यकारी अध्यक्षलाई स्पष्टीकरण सोधिएको र त्यसपछि पनि सचेत गराउने काम भने जारी नै रहेको बताए ।
नेपाल वायुसेवाका अध्यक्षमाथि आएका कार्यालयभित्रै तथा सर्वसाधारण नागरिक र सेवाग्राहीको गुनासाका विषयलाई मन्त्रालयले अध्ययन गरेर अध्यक्षलाई सम्झाइबुझाइ गरी सुधारका लागि कैयौँ पटक मौका दिए पनि त्यसमा सुधार नआएको मन्त्री आलेले बताए ।
.jpg)
