काठमाडौं । आम जनता पार्टीका अध्यक्ष तथा पूर्वमन्त्री प्रभु साहले नेपालको भूमि लिपुलेक हुँदै भारत र चीनले व्यापारिक नाका सञ्चालन गर्ने बारेमा संसदलाई जानकारी गराउन सरकारसंग माग गरेका छन् ।
शुक्रबार बसेको प्रतिनिधिसभाको बैठकमा साहले नेपालको भौगोलिक अखण्डता र सार्वभौमिकतासंग जोडिएको नेपालको लिपुलेक भूमिबारेमा चुप लाग्न नहुने बताउँदै उनले यस्तो माग गरेका हुन् ।
‘नेपालको भूमि लिपुलेक, कालापानी, लिम्पियाधुरा नेपालको भूमि हो भन्दै सरकारले दुवै देशलाई कूटनीतिक नोट पठाएको थियो । यदी कूटनीतिक पहल गर्दैगर्दा यस्तो किन सुन्नमा आयो,’ साहले भने, ‘हाम्रा राजदूतहरू के गरेर बसेका छन् ? ति देशका राजदूतको कार्यसम्पादन मूल्याङ्याकन गर्ने बेला आएको छ । नेताहरूले आफ्ना आसेपासे, नातागोता, विश्वासपात्रलाई राजदूत बनाउनुहुन्छ र उहाँहरू त्यहाँ डलरको व्यापार गर्नुहुन्छ । हैनभने किन प्रगति देखिएन ?’
प्रतिपक्षमा भएको बेलामा अहिलेका प्रधानमन्त्री केपी शर्मा ओलीले ति भूभाग समस्या होइन फिर्ता ल्याउने कुरा गर्नुस भन्ने गरेको उनले स्मरण गरे । अहिले भारत र चीनको भ्रमणको कुरा सार्वजनिक भइरहेको बताउँदै साहले भ्रमणको पहिलो सूचीमा यो विषय पर्छ कि पर्दैन भन्ने प्रश्न गरे ।
‘भ्रमणको पहिलो सूचीमा यो विषय पर्छ कि पर्दैन ? समस्याको रूपमा पर्छ कि फिर्ता लिने गरी पर्छ भन्ने म प्रश्न गर्न चाहन्छु । आज उहाँहरू नेपालमै हुनुहुन्छ (प्रधानमन्त्री र परराष्ट्रमन्त्री) र काठमाडौंमै हुनुहुन्छ । प्रधानमन्त्री पनि यहीँ हुनुहुन्छ, परराष्ट्रमन्त्री पनि यही हुनुहुन्छ,’ साहले भने, ‘यस्तो महत्त्वपूर्ण विषयमा संसद र जनतालाई जानकारी गराउनुको साटो, एकमत भएर यसको प्रतिकार गर्नुको साटो यहाँ केही फुटकर आवाज बनाएर कहाँ पुर्याउन खोज्नुभएको छ ? राजनीतिक स्टन्टले यसलाई नोक्सानी पुर्याउँछ ।’
भौगोलिक अखण्डता र सार्वभौमिकतासंग जोडिएको यस्तो विषयमा गम्भिर भएर अगाडि बढ्नुको विकल्प नभएको उनले बताए ।
साहले केही दिनअघि रौतहटको गौरमा शहाबुदिन मियाँ भन्ने एक युवाको हत्या भएको भन्दै निष्पक्ष छानबिन गर्नुपर्ने माग गरे । पीडित परिवारलाई न्याय दिनुपर्ने उनको भनाइ छ ।
