लमजुङ । नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल प्रचण्डले संघीय लोकतान्त्रिक गणतन्त्रको वर्तमान अवस्था त्याग र बलिदानको उपलब्धि भएको बताएका छन् ।
लमजुङको बेशिशहरमा नेपाल तामाङ घेदुङ जिल्ला समितिको आयोजनामा आयोजित तामाङ समुदायको सांस्कृतिक तथा संग्रहालय भवनको उद्घाटन समारोहमा भर्चुअल रूपमा प्रमुख अतिथिको रूपमा सहभागी हुँदै प्रचण्डले यस्तो बताएका हुन् ।
देश संघीय लोकतान्त्रिक गणतन्त्रमा गए पनि संविधानले सबै उत्पीडित वर्ग तथा समुदायलाई पूर्ण अधिकार दिन नसकेको प्रचण्डको भनाइ छ ।
‘हामी अहिले जुन चौतारीमा आइपुगेका छौँ, त्यो त्याग र बलिदानको परिणाम हो । तर अझै पनि उत्पीडित वर्ग र समुदायले जुन अधिकार पाउनुपर्ने हो, त्यो हदसम्म पुग्न सकेका छैनौँ,’ प्रचण्डले भने ।
संविधान बनाउँदा केही विषयमा सम्झौता गर्न बाध्य भए पनि उत्पीडित वर्गका मुद्दाहरूलाई संविधानसभामै रिजर्भेसन, भिन्न मत वा नोट अफ डिसेन्ट दर्ता गरिएको स्मरण गराउँदै प्रचण्डले अब ती मुद्दालाई फेरि अगाडि बढाउने प्रतिबद्धता जनाए ।
पछिल्लो कार्यकालमा सरकारको नेतृत्व सम्हाल्दासमेत सुशासन, सामाजिक न्याय र आर्थिक विकासका पक्षमा विशेष पहल लिएर काम गरेको उनले बताए । ‘त्यही जमर्काेका कारण प्रतिक्रियावादीहरू, पहिचान र अधिकार विरोधीहरूले हामीलाई सरकारबाट बाहिर जान बाध्य पारे,’ उनले भने ।
पार्टी सरकार बाहिर भए पनि जनतासमक्ष विभिन्न अभियानमार्फत जोडिँदै पुनः अभियानमार्फत सुशासन, पहिचान, अधिकार र समावेशीताका मुद्दालाई देशव्यापि रूपमा उठाउने तयारी भइरहेको उनले बताए ।
‘अब छिट्टै, भदौको तेस्रो साताबाट हामीले त्यस अभियानलाई फेरि पूर्णता दिने तयारीमा छौँ,’ प्रचण्डले भने ।
तामाङ घेदुङलाई सांस्कृतिक पहिचान, अधिकार र संघर्षको साझा चौतारीका रूपमा उल्लेख गर्दै उनले उक्त संस्थाले गर्दै आएको प्रयासप्रति खुसी व्यक्त गरे ।
सो अवसरमा प्रचण्डले लमजुङको सांस्कृतिक तथा संग्रहालय भवन तामाङ समुदायको हक र पहिचानको सन्देश दिने एउटा बलियो प्रतीक बन्ने विश्वास व्यक्त गरे ।
