काठमाडौं । यही ३१ अगष्टमा भारतीय प्रधानमन्त्री नरेन्द्र मोदी चीन जाँदै छन् । उतारचढावपूर्ण सम्बन्ध रहेका भारत र चीन पछिल्लो समय सम्बन्ध सुधारको प्रयासमा छन् । यस्तो बेला हुन लागेको मोदीको चीन भ्रमणलाई अर्थपूर्ण रूपमा हेरिएको छ ।
तर, भारतीय मिडियाहरूका अनुसार मोदीको चीन भ्रमण तय हुनुअघि दुईवटा असाध्यै महत्त्वपूर्ण घटनाहरू भएका छन् । र, यो भ्रमणमा ती घटनाले पनि निर्णायक प्रभाव पारेका छन् ।
ब्लुमबर्गलाई हवाला दिँदै भारतीय मिडिया दैनिक भास्करले लेखेको छ- चिनियाँ राष्ट्रपति सी चिनफिङले भारतीय राष्ट्रपति द्रौपदी मूर्मूलाई एक पत्र पठाएका थिए । जसमा सीले भारत र अमेरिकाबीचको सम्झौताले चीनलाई हुन सक्ने क्षतिप्रति चिन्ता जनाएका उक्त रिपोर्टमा उल्लेख रहेको समाचारमा जनाइएको छ ।
खासमा गत मार्चमा अमेरिकी राष्ट्रपति डोनाल्ड ट्रम्पले चीनमाथि एकपछि अर्को गर्दै कर लगाउन थालेपछि बेइजिङले दिल्लीसँग सम्पर्क बढाउन थालेको थियो । त्यही बेलादेखि बेइजिङले गोप्य रूमा दिल्लीसँग सम्पर्क बढाएको उक्त रिपोर्टमा उल्लेख छ । जसमा बेइजिङले भारतसँगको सम्बन्ध सुधारका विषयमा पनि उल्लेख गरेको थियो ।
बेइजिङको उक्त पत्र मोदीसम्म पनि पुर्याइएको र त्यससँगै भारत र चीनबीचको सम्बन्ध सुधार हुँदै गएको रिपोर्टमा बताइएको छ । त्यहीँबाटै मोदीको चीन जाने तयारी भित्रभित्रै सुरु भएको थियो ।
ब्लुमबर्गको रिपोर्टलाई आधार मानेर भाष्करले प्रकाशित गरेको उक्त समाचारमा यो पनि भनिएको छ- सम्बन्ध सुधारको यो प्रयासले त्यतिबेला तीव्रता लियो जतिबेला ट्रम्पले भारतलाई झस्काउने गरी दुईवटा कदम उठाए ।
ट्रम्पले उठाएको पहिलो कदम थियो- भारत र पाकिस्तानको युद्ध आफूले रोकिदिएको दाबी गर्नु । जबकि भारत त्यसमा कुनै पनि विदेशी शक्ति वा राष्ट्रलाई जोड्न चाहँदैन थियो । अनि ट्रम्पको यो दाबीलाई भारतले अस्वीकार पनि गरेको थियो ।
अनि दोस्रो हो- ट्रम्पले भारतमाथि पनि ५० प्रतिशतसम्म कर लगाउने घोषणा गरिदिए । यी दुईवटा कदमका कारण पनि भारत र चीनबीचको सम्बन्ध सुधारमा उल्लेख्य प्रभाव परेको उक्त रिपोर्टमा उल्लेख गरिएको जनाइएको छ ।
यही पेरिफेरीमा मोदी ७ वर्षपछि चीन जान लागेका हुन् ।
