काठमाडौं । अख्तियार दुरुपयोग अनुसन्धान आयोगले जाजरकोटको भेरी नगरपालिकाका निमित्त प्रमुख प्रशासकीय अधिकृत दल बहादुर घर्तीलगायतविरुद्ध भ्रष्टाचार मुद्दा दायर गरेको छ ।
अख्तियारले उनीसहित, इन्जिनियरसमेत ८ जना र कम्पनी उपर सार्वजनिक सम्पत्ति हानिनोक्सानी गरी भ्रष्टाचार गरेको सम्बन्धी आरोपपत्र यही भदौ १२ गते बिहीबार दायर गरेको अख्तियारका सहायक प्रवक्ता गणेशबहादुर अधिकारीले जानकारी दिएका छन् ।
उनीहरूमाथि वडा नं. ६, ९ र १० को वडा कार्यालय भवन बनाउँदा अनियमितता गरेको अभियोग लगाइएको छ ।
उक्त कार्यलय भवन बनाउँदा बोलपत्रमा भाग लिएका अन्य बोलपत्रदातालाई अनुत्तीर्ण गरी नियोजित रूपले मिलेमतो गरी न्यू बीके/नहकुली जेभीलाई ठेक्का दिएको आरोप लगाइएको छ ।
अख्तियारले निमित्त प्रमुख प्रशासकीय अधिकृत घर्तीसहित इन्जिनियर मोहन मल्ल, कानुन अधिकृत प्रकाश कुमार शाही, सामाजिक विकास अधिकृत अनिस साह, लेखापाल राजेन्द्र बहादुर कठायत र जिन्सी शाखा प्रमुख तथा नायब सुब्बा कृतिबहादुर थापाविरुद्ध ३६ लाख २० हजार ५७८ रुपैयाँ १० पैसा बीगो कायम गरी मुद्दा दायर गरेको छ ।
त्यस्तै न्यू बीके/नहकुली जेभी तथा त्यसका साझेदारहरू न्यू बीके बिल्डर्स एन्ड सप्लायर्सका प्रोपाइटर गंगाकुमारी खड्का र नहकुली निर्माण सेवाका प्रोपाइटर चित्रबहादुर बोहरा विरुद्ध ३६ लाख २० हजार ५७८ रुपैयाँ १० पैसा बिगो कायम गरी विशेष अदालत काठमाडौंमा मुद्दा दायर गरेको छ ।
