काठमाडौं । सामाजिक सञ्जाल फेसबुक र ट्वीटरपछि भिडियो प्लेटफर्म युट्युवमा पनि अमेरिकी राष्ट्रपति डोनाल्ड ट्रम्प निलम्बनमा परेका छन् ।
मंगलबार युट्युबले ट्रम्पको च्यानललाई कम्तिमा एक साता निलम्बित गर्ने घोषणा गरेको हो ।
ट्रम्पको च्यानलबाट हालिएका सामाग्रीहरुले युट्युबको नीति उल्लंघन गरेको कम्पनीद्वारा जारी गरिएको विज्ञप्तिमा उल्लेख छ ।
युट्युबले उनको च्यानलमा अपलोड गरिएका भिडियोमा कमेन्ट गर्न पनि प्रतिबन्ध लगाइने जनाएको छ ।
यद्यपी, ट्रम्पको च्यानलबाट अपलोड गरिएका कुन भिडियोले युट्युबको नीति उल्लंघन गर्यो भनेर खुलाइएको छैन ।
यसअघि ट्वीटरले ट्रम्पको एकाउन्ट स्थायी रुपमै बन्द गरेको थियो । त्यस्तै, फेसबुक र इन्स्टाग्रामले पनि ट्रम्पलाई अनिश्चितकालीन प्रतिबन्ध लगाएका छन् ।
अमेरिकी संसद् भवनमा ट्रम्पका समर्थकहरुले गत साता हिंसात्मक प्रदर्शन गरेपछि उनीमाथि धमाधम प्रतिबन्ध लाग्न थालेको हो ।
नवनिर्वाचित राष्ट्रपति जो बाइडेनको विजयलाई अनुमोदन नगर्न दबाब दिने उद्देश्यले गत साता बुधबार ट्रम्प समर्थकहरुले संसद् भवन घेराउ गरेका थिए ।
हुलदंगाका क्रममा गोली चल्दा पाँच जनाको मृत्यु भएको थियो । ट्रम्पले नै दबाब सिर्जना गर्नका लागि आफ्ना समर्थकहरुलाई आग्रह गरेका थिए ।
यी सबै घटनाका बाबजुद जो बाइडेनलाई नयाँ राष्ट्रपतिका रुपमा अमेरिकी संसद्ले अनुमोदन गरिसकेको छ ।
.jpg)
